زوجتي أو أهلي

المشكلة : أنا موظف عمري 32 سنة ,تزوجت زواج تقليدي من ثلاث سنوات و ندمت على ذا الزواج.امي راحت و شافت البنت و عجبتها و ملكنا و بعد ستة أشهر تزوجنا و الحين صار عندي ولدين.كل يوم عوار راس و و كلام له أول ماله آخر و السبة ..زوجتي تغار علي من امي و خواتي ..لو أقعد معاهم أسولف لو نظحك لو نجلس مع بعض تقعد تنافخ و تثور و تناديني حق اي سبب و تصير تبي تروح البيت.ما تبي تزورهم ولا تيجيهم ولا تروح لهم , ولا تبغاهم يجونا بيتنا .و يوم المناسبات العائلية لو العيد نقعد قبل يومين و حنا هواش و مشاكل و تجيب تاريخ العايلة كل ابوهم بالعيار و التطنز حسبالها اني بكرهم و ابعد عنهم. و أصبر عليها احياناو أوقات ثانية ما أقدر أمسك نفسي من الصياح و توصل لمرحلة اني صرت أكره بيتي و أطلع و أروح الاستراحة من حدة لسانها هاذيلن أهلي ..امي و اخواني و خواتي ..و اهي زوجتي و ام عيالي .حتى اهلي قامو يحسون انها شايفة نفسها عليهم و بتحتقرهم أبي حل لذي المشكلة !!!

الحل : حاول دمج زوجتك مع عائلتك ودعها تحس بأمه مرحب بها فمثلا اشرك زوجتك بسوالفك وجلساتك مع اهلك. كونك تقعد وتتسلى مع اخوانك وامك شيء طبيعي جدا لكن اشراك زوجتك في جلساتكم سيخفف من غيرتها حتما. من الممكن ان تساعدك الوالدة في هذا الامر، اطلب من والدتك كونها الأكبر والأكثر خبره ان تحن على زوجتك وتشركها في جلساتكم، فلتسالها مثلا عن قصه طريفة سمعتها او عن رايها فيما تناقشونه وان شاء الله سترى زوجتك وقد اندمجت مع العائله وبدأت تعتبر نفسها فردا منها دون أي ضيق او تذمر.