تزوجت حتى يكون لي سند يحميني لكن كل هذا لم أجده في زوجي

بسم الله الرحمن الرحيم ، قصتي يااخواني طويله شوي لكني بحاول اختصر الاهم منها ، انا واحده ترملت من زوجي الاول وعندي 22 سنه وكان لي منه ولد واحد ، طبعآ كانت اصعب مرحله بحياتي هي اربع سنوات قعدت فيها ارمله عانيت من مشاكل ماديه ونفسيه وعشت مع اخواني علمآ بأن والدي متوفي ، ماكنت املك اي مصدر دخل غير راتب زوجي المتوفي اللي يلا كان يوفر لي القليل من احتياجاتي ، تقدم لي اكثر من شخص اللي كان اعزب ، واللي مطلق واللي متزوج وكنت ارفض بحجه ابني لانه بعده صغير المهم كبر الولد وكانت الظروف معي جدا صعبه ، الولد راح لأهله اللي هم جدة وجدته عشان يدخل المدرسه وكانت ظروفهم احسن مني بكثير انهم يهتموا فيه ، وقتها كان فيه شخص متقدم لي الحقيقه انه لما تقدم قال لأهلي انه متزوج بثنتين حريم وانه راح يعطيني سكن لحالي وانه عادل بين زوجاته ومستعد يعيشني عيشه هنيئه ، طبعا اخواني غرتهم فلوسه وطمعهم في المهر لانهم ماعطوني من مهري الا جزء بسيط قلت لنفسي يلا المهم الزوج يكون كويس مو مهم الفلوس ، تزوجته وقعدت انا وهو ثلاث ايام بفندق وقال انه الشرع احل لي ثلاث ايام لاني ثيب وبعدها يقسم الليالي بيننا ، انا بعد هذه الثلاث الايام اخذني ع السكن اللي قال انه لي لحالي اكتشفت انها شقه بنفس البيت انا وضرايري يعني سكن واحد اشوفهم قدامي وعايشين مع بعض وانهم ثلاث حريم مو ثنتين ، وكمان مطلق واحده من قبل وعنده منها ولدين قاعدين بالبيت وين ماراح ابوهم ياخذهم معاه لان امهم تخلت عنهم لما ابوهم تزوج عليها ، اي اني اكتشفت اني تزوجت رجل مزواج يتزوج ويطلق ويرد يتزوج وهكذا ، ولو كان هذا بس يكفي اولا ماتقبل ابني ببيته ابدا ، ثانيآ انا صار لي اللحين سنه ونص متزوجه وعندي منه ولد ، الشخص هذا يعاملني كأني جاريه خذعني بالحب والكلام والغزل اللحين انا ولا شئ بنسبه له لايعدل في معامله ولا في اثاث ولا بعلاج اشوفه يسوي لحريمه اشياء نايسويها لي ، من سته شهور طلق الزوجه اللي هي رقم اربعه واللحين يريد يتزوج علي يعني كل ماراحت وحده يتزوج ع طول غيرها ، فتره يمل منها ويطلق ، بخيل جدا الا ع نفسه ، ماعاد عرفت ايش اعمل اذا طلبت الطلاق رجعت لأخواني وماعندي اي مصدر دخل نهائيآ ، وافكر بالولد اللي انجبته منه وين اخليه مين راح يرعاه البيت هنا كله خالات اي نساء الاب ماحد راح تحب عيال زوجها ، انا في حيره الرجال هذا لا يحترمني ولا عامل رب العالمين فيني يقولي روحي في ستين داهيه بعد ماكان يقول مااتخلى عنك ابد ، هو عارف ظروفي اني يتيمه وماعندي سند بالحياة ورغم ذلك معاملته لي جدآ سيئه انا اصغر منه ب٣٥ سنه صغيره هو اكبر مني هو وحريمه مع ذلك مو مقدرني ولا عامل لي قيمه صرت ادعي عليه قهرني زادني هم ووجع، انا تزوجت عشان يكون لي رجال سند يحميني ويصرف علي ويخاف الله فيني كل هذا ماوجدته بزوجي ابد ، هل تصرفه معي هذا حرام وكيف اتصرف بمشكلتي هذه ، اللحين هو عاقد ع واحده دايما يتواصل معها وانا كم ارسل له رسايل واتصل عليه يسوي لي حظر ومايرد والله تعبت حسبي الله عليه

السلام عليكم المثل يقول وقع الفاس على الراس،، نعم انت تزوجت مزواجا مطلاقا لا نقول خطؤك ام خطأ اخوانك ولكن لديك سكن شقة منفصلة وهذا مهم لديك ولد منه وسيضيع منك لا بديل لك تعاملي معه بالحسنى لتحافظي علي الاقل علي الموجود وعلى الاحترام لا يمكن ان تحصلي منه بما حلمت ولكن حاولي ان تحصلي بالموجود ،، لاداعي لك بمن يتزوج او يطلق حافظي انت علي مكانتك وتربية ابنك وحاولي الحصول منه علي افضل ما تستطيعي وان كان اقل من احلامك فوضعك صعب وقد يصبح اصعب لاحقا .. لا تجادليه كثيرا في الحقوق والواجبات فلن يستمع ولا يفعل الا ما يرضيه واهتمي بنفسك وابنك وبنفقتكما وتجنبي الشجار معه