كشفت إسراء طاهر الخطيبة السابقة للإعلامي الراحل عمرو سمير عن أدق التفاصيل عنه ، وقالت من خلال صفحتها على "فيسبوك" : "فيه ناس كتير مكانتش بتستوعب أو بتبلع صداقتي أنا وعمرو لمجرد اقتناعهم إن مينفعش اتنين كانوا مخطوبين يبقوا أصحاب بعد كده ، بس أنا بحمد ربنا إننا عرفنا نبقى كده ، وبحمد ربنا إننا في الشهرين اللي فاتوا كنا قريبين أكتر من أي فترة في صداقتنا ، كانت صداقة ليها شكل خاص جدًا إحنا بس اللي فاهمينه".
وأضافت إسراء "رمضان اللي فات كنت بحكيله إني مش عارفة أقرأ قرآن بشكل كافِ بسبب التصوير ، قعد تقريبًا رمضان كله يشجعني إني أقرأ ويفكرني كل شوية أو يصور لي صورة من الجزء اللي هو فيه ويبعتهالي عشان يغيظني ويحمسني ، ليلة ٢٧ كلمني مكالمة طويلة أوي وهزرنا كتير واتفقنا على حاجات نعملها بعد العيد، بعدها بدأنا نتكلم عن ربنا وقعد يتكلم عن قد إيه بيحبه أوى وبيزعل لو زعله ونفسه دايمًا يعمل مجهود عشان يقرب منه، قعد يشجعني ويدعمني في حاجات ليها علاقة بكلامنا كان عارف إنها مضايقاني".
وتابعت إسراء "في أخر المكالمة قال لي أنا عارف إنك زعلانه عشان مش هتعرفي تصلى التهجد وإنتي في التصوير بس أنا هدعيلك وأنا بصليها، وانتي برضو أقعدى إدعي وسبحي لحد الفجر، وبعد الصلاة كلمني وقال لي دعيتلك كتير أوى" ، ويذكر أن الإعلامي عمرو سمير توفي فجأة فى الخارج.